თეიმურაზ იოსელიანი
თეიმურაზ იოსელიანი (დ. 21 ოქტომბერი, 1929, ქუთაისი — გ. 16 ივლისი, 2013) — ქართველი ფიზიოლოგი, ბიოლოგიის მეცნიერებათა დოქტორი, თსუ-ს პროფესორი.
1955 წელს დაამთავრა თბილისის სახელმწიფო უნივერსიტეტის ბიოლოგიის ფაკულტეტი.
1958–1961 წლებში იყო ფიზიოლოგიის ინსტიტუტის უმცროსი მეცნიერ თანამშრომელი, 1961–197 წლებში უფროსი მეცნიერ თანამშრომელი და 1976–1983 წლებში ამავე ინსტიტუტის ლაბორატორიის გამგე; 1960–1970 წლებში თბილისის სახელმწიფო უნივერსიტეტის ადამიანთა და ცხოველთა ფიზიოლოგიის კათედრის დოცენტი, 1978–2006 წლებში კათედრის გამგე და 1970 წლიდან ამავე უნივერსიტეტის პროფესორი; სოროსის ფონდის პროფესორი. 1974 წელს კითხულობდა ლექციების კურსს იენის (გერმანია), 1980 წელს ლუელის (აშშ) და 1985 წელს ჰომბურგ-ზაარის (გერმანია) უნივერსიტეტებში.
არის ასოცდაათზე მეტი ნაშრომის და მათ შორის მონოგრაფიის — „ზურგის ტვინის ინტეგრაციული მოქმედებების ნერვული მექანიზმები“ და სახელმძღვანელოების: „კუნთოვანი და ნერვული სისტემების ზოგადი ფიზიოლოგია“, „ზოგადი ნეიროფიზიოლოგია“, „ფიზიოლოგია, ვისცერალური სისტემები“ ავტორი.
საკანდიდატო დისერტაციის თემა — „ჟელატინოზური სუბსტანციის როლი ზურგის ტვინის რეფლექსურ მოქმედებაში“, დაიცვა 1959 წელს; სადოქტორო დისერტაციის თემა — „ზურგის ტვინის ინტეგრაციული ნერვული მოქმედების მექანიზმები“, დაიცვა 1968 წელს.
ორგანიზაციის, ასოციაციის ან ჯგუფის წევრი რედაქტირება
- ეკოლოგიურ მეცნიერებათა აკადემია, ნამდვილი წევრი (1995-)
- თავის ტვინის შემსწავლელი საერთაშორისო ორგანიზაცია, წევრი (1974-)
- მედიცინის მეცნიერებათა აკადემია, ნამდვილი წევრი (1994-)
- ნიუ–იორკის აკადემია, ნამდვილი წევრი (1995-)
- საბუნებისმეტყველო მეცნიერებათა აკადემია, პრეზიდენტი (1994-)
- საქართველოს მეცნიერებათა აკადემია , აკადემიკოსი (1983-)
- ფიზიოლოგიის ინსტიტუტთან არსებული სამეცნიერო ხარისხების მიმნიჭებელი სპეციალური საბჭო, თავმჯდომარე (1976–1979)
ჯილდოები, პრემიები და პრიზები რედაქტირება
- 2003 — ქუთაისის საპატიო მოქალაქე
- 2002 — საქართველოს სახელმწიფო პრემია
- 1998 — წლის გამოჩენილი ადამიანი
- 1998 — ღირსების ორდენი
- ორიათასწლეულის საპატიო ოქროს მედალი