ვარსკვლავური ომები, ეპიზოდი II: კლონების შეტევა

„ვარსკვლავური ომები, ეპიზოდი II: კლონების შეტევა“ (ინგლ. Star Wars Episode II: Attack of the Clones) — 2002 წლის ეპიკური კოსმოსური ოპერის ჟანრის რიგით მეხუთე ფილმი ციკლიდან „ვარსკვლავური ომები“. ამასთან, ქრონოლოგიური მოვლენების მიხედვით, ეს არის 1977-1983 წლებში გადაღებული კინოტრილოგიის მოვლენებამდე დატრიალებული ამბების ქრონიკა, რომელსაც თავის მხრივ, სხვა წინარეისტორია გააჩნია.

„ვარსკვლავური ომები, ეპიზოდი II: კლონების შეტევა“
რეჟისორი	ჯორჯ ლუკასი
პროდიუსერი	რიკ მაკ-კალუმი, ჯორჯ ლუკასი
სცენარის ავტორი	ჯორჯ ლუკასი, ჯონათან ჰეილსი
როლებში	იუან მაკგრეგორი ჰეიდენ კრისტენსენი ნატალი პორტმანი სემუელ ლ. ჯექსონი კრისტოფერ ლი
კომპოზიტორი	ჯონ უილიამსი
ოპერატორი	დევიდ ტეტერსელი
მონტაჟი	ბენ ბერტი
სტუდია	Lucasfilm
დისტრიბუტორი	20th Century Fox
გამოსვლის თარიღი	16 მაისი, 2002
ხანგრძლივობა	142 წთ.
ქვეყანა	აშშ
ენა	ინგლისური
ბიუჯეტი	115 მილიონი აშშ დოლარი
შემოსავალი	649.4 მილიონი აშშ დოლარი

სიუჟეტი

ყურადღება!  ქვემოთ მოყვანილია სიუჟეტის და/ან დასასრულის დეტალები.

გალაქტიკური იმპერია კრიზისშია. გრაფ დუკუს ხელმძღვანელობით შექმნილი სეპარატისტული მოძრაობა გალაქტიკაში მშვიდობის საშიშროებას წარმოადგენს. სენატორი პადმე ამიდალა, ნაბუს ყოფილი დედოფალი, ბრუნდება გალაქტიკურ სენატში, რათა რესპუბლიკის არმიის შექმნის წინააღმდეგ გამოვიდეს. პლანეტა კორუსანტზე ჩასვლისას ვიღაც ცდილობს მის მოკვლას. ამით შეშინებული კანცლერი პალპატინი ამიდალას დასაცავად ირჩევს ობი-ვან კენობისა და მის მოსწავლე ენეკინ სკაიუოკერს. იმავე ღამით ვიღაც კვლავ ცდილობს ამიდალას მოკვლას. ეს არის ზემ ვესელი, დაქირავებული მკვლელი. იმ დროს, როდესაც ჯედაები ცდილობენ, დაადგინონ, თუ ვინ გასცა ამიდალას მოკვლის ბრძანება, ზემს კლავს უცნობი მკვლელის გასროლა. ჯედაების საბჭო ობი-ვანს ავალებს მკვლელობის მცდელობის გამოძიებას, ხოლო ენეკინს - ამიდალას უშუალო დაცვას, მას შემდეგ რაც იგი დაბრუნდება მშობლიურ პლანეტა ნაბუზე. ენეკინს უხარია, ვინაიდან მანამდე იგი მასწავლებლის კრიტიკას ისმენდა, ახლა კი მნიშვნელოვანი დავალება მისცეს, თანაც საშუალება აქვს, პადმესთან ერთად განმარტოვდეს (იგი უკვე გრძნობს, რომ უყვარს ამიდალა). მაგრამ, მას აწუხებს კოშმარები ტატუინზე დარჩენილ დედაზე.

ამ დროისთვის, ობი–ვანი აღმოაჩენს კლონურ ქარხანას პლანეტა კამინოზე, სადაც რესპუბლიკისთვის საიდუმლოდ იქმნება არმია. კლონების დნმ–ის დონორი აღმოჩნდება ჯენგო ფეტი, დაქირავებული მკვლელი. ობი–ვანი არკვევს, რომ სწორედ მას დაავალეს პადმე ამიდალას მკვლელობა. გამოაშკარავების შიშით, ფეტი თავის პირად კლონებისნ ერთად, რომელსაც შვილივით ზრდის, პლანეტა ჯეონიზისზე გაიქცევა. კვალში ჩამდგარი ობი–ვანი პლანეტაზე აღმოაჩენს სავაჭრო ფედერაციის ხომალდებს და დროიდების უზარმაზარ ქარხანას. ამ, დროისთვის, კოშმარებით შეწუხებული ენეკინი პადმესთან ერთად ტატუინზე მიემგზავრება, იქ გებულობს, რომ დედამისი ტყვედ ჩაუვარდა ქვიშის ხალხს, ტატუინის სასტიკ ველურთა ტომს. ენეკინი ჩუმად შეიჭრება მათ ბანაკში, სადაც დედამისს სიკვდილის წინ მიუსწრებს. მისი სიკვდილით გაბოროტებული, იგი ბთელ ბანაკს ამოწყვეტს. დაბრუნებული, იგი გებულობს, რომ ობი–ვანმა ჯეონიზისზე აღმოაჩინა საბრძოლო დროიდების ქარხანა, მაგრამ გრაფმა დუკუმ, რესპუბლიკის წინააღმდეგ მოქმედი სეპარატისტული მოძრაობის ლიდერმა, იგი შეიპყრო.

პადმესთან ერთად ობი–ვანის გამოსახსნელად ჯეონიზისზე წასულ ენეკინსაც შეიპყრობენ და სამივეს გლადიატორთა არენაზე მხეცებთან შესაბრძოლებლად გაუშვებენ. ცოტა ხანში მათ გამოსახსნელად არენაზე შეიჭრებიან ჯედაები, მაგრამ დიდი მსხვერპლის ფასად, მათაც შეიპყრობენ. დუკუს „გულუხვ“ წინადადებაზე დანებების შესახებ, ჯედაებმა უარით უპასუხეს, სწორედ ამ დროს ჩნდება კლონების არმია ჯედაი იოდას მეთაურობით. იმართება გაცხარებული ბრძოლა კლონებს და დროიდებს შორის.

შუა ბრძოლაში ენეკინი და ობი–ვანი შეამჩნევენ გრაფ დუკუს, რომელიც გაქცევას ცდილობს. ისინი მასთან ბრძოლას იწყებენ. დუელში დუკუ ობი–ვანს მკლავში და ფეხში დაჭრის, ხოლო ენეკინს ხელს მოჰკვეთავს. როდესაც იგი ორივეს ამარცხებს, ჩნდება იოდა/ დუკუ მასთან ბრძოლას სხვადასხვა ხერხებით დაიწყებს, თავდაპირველად — ძალით, შემდეგ ძალური მეხით, ბოლოს კი - სხივული ხმლებით. დუელში იოდას გამარჯვების ყველა ნიშანი ჩანს, მაგრამ დუკუ იქვე აღმართულ სვეტს ამტვრევს და გონდაკარგული ენეკინისა და ობი–ვანისაკენ მიმართავს. სანამ იოდა სვეტის მათგან უსაფრთხო მანძილზე გადატანას ცდილობს, დუკუ თავის ხომალდში ჯდება და გარბის.

კორუსანტზე მისული დუკყ საიდუმლო საბრძოლო მანქანის სქემებს გადასცემს დართ სიდიუსს. როგორც ირკვევა, ეს მანქანა სიკვდილის ვარსკვლავია. ამასთანავე დუკუ სიდიუსს ეუბნება, რომ გეგმა სრულდება, ვინაიდან ომი დაიწყო. ამ დროისთვის, ჯედაების ტაძარში, ობი–ვანი, იოდა და მეის ვინდუ განიხილავენ ჯეონიზისზე მომხდარ მოვლენებს. ობი–ვანი ამბობს, რომ კლონების გარეშე ისინი ვერ გაიმარჯვებდნენ, რაზეც იოდა პასუხობს, რომ ბრძოლაში კლონების ჩართვამ გამარჯვება არ მოიტანა, ამან გამოიწვია კლონური ომის დაწყება.

ფილმი მთავრდება სცენით, სადაც ენეკინი და პადმე საიდუმლოდ ქორწინდებიან.

რესურსები ინტერნეტში

• „ვარსკვლავური ომები, ეპიზოდი II: კლონების შეტევა“ — კინოფილმების ინტერნეტ-მონაცემთა ბაზა (ინგლისური)
• „ვარსკვლავური ომები, ეპიზოდი II: კლონების შეტევა“ — Rotten Tomatoes
• „ვარსკვლავური ომები, ეპიზოდი II: კლონების შეტევა“ — Box Office Mojo-ზე
• „ვარსკვლავური ომები, ეპიზოდი II: კლონების შეტევა“ — Allmovie-ზე