ვანთების ეკლესია

ვანთების ეკლესია — ეკლესია მცხეთის მუნიციპალიტეტის სოფელ ზემო ნიჩბისში. მდებარეობს სოფლის სამხრეთით 2 კილომეტრზე. აგებულია IX-X საუკუნეებში.

ეკლესია სამეკლესიანი ბაზილიკაა (11,6 X 10,8 მ), დგას ერთსაფეხურიან ცოკოლზე, ნაგებია ნატეხი ქვით. სამივე ეკლესიას აღმოსავლეთით მართკუთხედში ჩახაზული ნახევარწრიული აფსიდი აქვს. შუა ეკლესია (სიგრძე 3,3 მ) გვერდით ეკლესიებთან (ჩრდილოეთ ეკლესიის სიგრძე 2,3 მ, სამხრეთ ეკლესიის სიგრძე 2,6 მ) შედარებით განიერია. მის აფსიდში შემორჩენილია ერთი სარკმელი, ხოლო დარბაზის ჩრდილოეთ კედელთან - ორი პილასტრი. შუა ეკლესია გვერდით ეკლესიებს თითო კარით უკავშირდებოდა. ეკლესია გადახურული ყოფილა ბრტყელი კრამიტით. ეკლესიის გარშემო გამოვლინდა სამაროვანი და ნასოფლარი.

ლიტერატურა

• საქართველოს ისტორიისა და კულტურის ძეგლთა აღწერილობა, ტ. 5, თბ., 1990. — გვ. 287.