არმაზის წმინდა გიორგის ეკლესიის წარწერა

არმაზის წმინდა გიორგის ეკლესიის წარწერა — ძველი ქართული ასომთავრული წარწერა ახალგორის მუნიციპალიტეტის სოფელ არმაზის წმინდა გიორგის სახელობის ეკლესიის სამხრეთ ფასადზე. დაზიანებული წარწერა აღმოაჩინა გიორგი ჩუბინაშვილის ხელმძღვანელობით ჩატარებულმა ექსპედიციამ 1935 წელს.

წარწერა

წარწერა რვა სტრიქონიანია:

1. ქ. სხ~ლთ
2. ა ღთისაჲ
3. თა მე გ
4. ...
5. მმს~ხლნ დ...
6. ე წ~ჲ ეკ~სჲ რკ ა
7. პ~დ ჴლ~მწფსა
8. ...სა

ანუ:

1. ქ. სახელით–
2. ა ღმრთისაჲ–
3. თა მე, გ[იორგი?]
4. [არმაზაელმან]
5. მამასახლისმან დ[ავიწყ]–
6. ე წმიდაჲ ეკლესიაჲ [ქ]რონიკონ[ს]ა
7. პ~დ, ჴელმწიფებასა
8. [გიორგის?]სა.

დათარიღება

წარწერა თარიღიანია. ქრონიკონი პ~დ = 84, რასაც ემატება 780. შესაბამისად წარწერა 864 წლით განისაზღვრება. ამ წელს დაუწყიათ ეკლესიის მშენებლობა.

ლიტერატურა

• ნ. შოშიაშვილი, ქართული წარწერების კორპუსი, I, თბ., 1980, გვ. 168
• კ დანელია, ზ. სარჯველაძე, ქართული პალეოგრაფია, თბ., 1997, გვ. 43–44