ჭუბულო

ჭუბულო — ქართული აბორიგენული წითელყურძნიანი საღვინე ვაზის ჯიში ლეჩხუმიდან.

გავრცელებული ყოფილა ლეჩხუმში, მაგრამ 1937-1939 წლებში შესწავლის დროს ერთადერთი ვაზი იყო დარჩენილი სოფელ სპათაგორში.

ბოტანიკური აღწერა

ზრდასრული ფოთოლი მცირე ზომისაა, მომრგვალო, ოდნავ განივოვალური. თითქმის დაუნაკვთავი. ფოთლის ქვედა მხარე სრულიად შეუბუსავია. ყვავილი ორსქესიანია. მტევანი მცირე ზომისაა, კონუსური, ხშირად ცილინდრულ-კონუსური, იშვიათად ცილინდრული ფორმის, მეჩხერი. მარცვალი საშუალო ზომისაა, მომრგვალო, შავი ან მუქი წითელი ელფერით. კანი თხელი აქვს, ცვილისებრი ფიფქით შესამჩნევად დაფარული. რბილობი წვნიანია, წვენი — შეუფერავი.

ჭუბულო საშუალო ზრდისაა. სავეგეტაციო პერიოდი კვირტის გაშლიდან სრულ სიმწიფემდე 156 დღეა. სრულ სიმწიფეში სექტემბრის ბოლოს შედის. მტევნის წონა 80-100 გრამია, საჰექტარო მოსავლიანობა კი 6.4-8.0 ტონა. ყურძნის სრული სიმწიფის პერიოდში მისი შაქრიანობა აღწევს 18%-ს, ხოლო მჟავიანობა — 8 გ/ლ-ს.

გამოიყენება სხვა ჯიშებთან ერთად სუფრის წითელი, მშრალი ღვინის დასამზადებლად.

ლიტერატურა

• უჯმაჯურიძე ლ., კაკაბაძე გ., მამასახლიშვილი ლ., „ქართული ვაზის ჯიშები“, თბ., 2018, გვ. 502