მთავარი მენიუს გახსნა

საკმიელა (საკმეველა, საკმეულა) — ქართული თეთრყურძნიანი ვაზის ჯიში. გურიის აბორიგენული ვაზის ჯიში. ფილოქსერისა და სოკოვან ავადმყოფობათა შემოჭრამდე მასობრივად იყო გავრცელებული მაღლარის სახით გურიაში, განსაკუთრებით კი მთისპირა სოფლებში. თეთრყურძნიან ჯიშებს შორის მას ყველაზე გამორჩეული ადგილი ეკავა, როგორც უხვმოსავლიან და იმავდროულად მაღალხარისხოვანი პროდუქციის მომცემს. სამეურნეო დანიშნულებით საკმიელა საღვინე ჯიშია. ხასიათდება ძლიერი ზრდა-განვითარებით, რაც შესამჩნევია ყლორტების პირველივე გამოჩენისთანავე. ცალკეული რქების სიგრძე ხშირად 3 მეტრი და მეტიცაა, უხვმოსავლიანია. დაბლარზე საშუალო საჰექტრო მოსავლიანობა შეადგენს 90-95 ცენტნერს, ხოლო სათანადო მოვლის პირობებში იგი გაცილებით მეტია. მაღლარად დაყენების შემთხვევაში, 1 ძირი, საჭირო აგროტექნიკური ღონისძიებების ჩატარების შემთხვევაში, საშუალოდ, 60-70 კგ. მოსავალს იძლევა. სოკოვან ავადმყოფობათა მიმართ სუსტად გამძლეა, ავადდება როგორც ჭრაქით, ისე განსაკუთრებით ნაცრით.

საკმიელა სიმწიფეს აღწევს ოქტომბრის პირველ რიცხვებში. ვაზზე დატოვებული ყურძენი ნოემბრამდე ძლებს, დაკრეფილი კი საზამთროდ არ ინახება. მტევანი საშუალო სიდიდის, ცილინდრულ-კონუსური, უფრო ცილინდრული. ფორმით მომრგვალო და სიმეტრიული. გვხვდება უფორმო მტევნებიც. საშუალო სიკუმსის, ზოგჯერ თხელი და განტოტვილი. მტევნის საშუალო წონა 126 გრამია, დიდი მტევნის წონაა 166 გრამი. მარცვალი ღია მწვანე, მზის მხარეს ოდნავ მოწითალო-ქარვისფერი, საშუალო სიმსხოსი ან საშუალოზე მცირე, მრგვალი ან მომრგვალო ფორმის, საკმაოდ სქელკანიანი, მცირედ ხორციანი და უფრო წვნიანი, სასიამოვნო ტკბილი გემოთი.

ყურძნის გემოვნებითი თვისებების, ქიმიური შემადგენლობისა და თვითმარცვლის კონსისტენციის მიხედვით, საკმიელა მიეკუთვნება ხარისხოვანი ღვინის ჯიშთა ჯგუფს. წვენის გამოსავლიანობა 78,7%, შაქრიანობა 20%, საერთო მჟავიანობა 8,5%. ღვინო მაღალი ხარისხის, ღია ქარვისფერი, ალკოჰოლის ნორმალური შემცველობით, მეტად ჰარმონიული, საკმაოდ სხეულიანი, ძვირფასი გემური თვისებებით.

იხილეთ აგრეთვერედაქტირება

ლიტერატურარედაქტირება

  • მ. ხარბედია, „ქართული ღვინის გზამკვლევი“, თბ., 2013, გვ. 55

რესურსები ინტერნეტშირედაქტირება