დიდმარხვა

დიდმარხვა, დიდი მარხვა, დიდი ორმოცეული — ქრისტიანობაში განსაკუთრებული თავშეკავების დრო, რომელიც მორწმუნეებს პასექის დღესასწაულის სათანადოდ შესახვედრად ამზადებს. დიდი მარხვა დადგენილია უდაბნოში იესო ქრისტეს ორმოცდღიანი მარხვის მოსახსენებლად და ვნების კვირის ჩათვლით გრძელდება 7 კვირა (49 დღე). დიდი მარხვის ტიპიკონურ მოთხოვნათა გასათვალისწინებლად ქრისტიანს განსაკუთრებული ყურადღება ჰმართებს, რადგან ეს პერიოდი საეკლესიო წესთა და ღმრთისმსახურებათა თავისებურებებით გამოირჩევა.

მოსამზადებელი პერიოდი

დიდი მარხვისათვის მოსამზადებელი შვიდეულებია:

1. მეზვერისა და ფარისევლის კვირა — რომლის დროსაც ღვთისმსახურებაზე იკითხება მაცხოვრის იგავი მეზვერესა და ფარისეველზე (ლკ. 18:9-14)
2. უძღები შვილის კვირა (ლკ. 15:11-32)
3. ხორციელის კვირა — საშინელი სამსჯავროს ხსენება.
4. ყველიერის კვირა — სამოთხიდან ადამის განდევნის ხსენება.

ლიტერატურა

• „მცირე საეკლესიო ენციკლოპედია“, «საქართველოს ეკლესიის 2005 წლის კალენდარი», თბ. 2004, გვ. 143