ბოსლები

ბოსლები — სოფელი საქართველოში, ქვემო ქართლის მხარის დმანისის მუნიციპალიტეტში (დიდი დმანისის თემი), მდებარეობს დმანისის პლატოზე. მდინარე კაკლიანის (მდინარე მაშავერის მარჯვენა შენაკადი) მარჯვენა ნაპირას. ზღვის დონიდან 1020 მეტრზე, დმანისიდან დაშორებულია 12 კილომეტრით. 2002 წლის აღწერის მონაცემებით სოფელში ცხოვრობს 667 კაცი.

სოფელი
ბოსლები
ქვეყანა	საქართველო
მხარე	ქვემო ქართლიქვემო ქართლის მხარე
მუნიციპალიტეტი	დმანისი
თემი	დიდი დმანისი
კოორდინატები	41°21′20″ ჩ. გ. 44°18′10″ ა. გ.
მოსახლეობა	397 (2014)
ეროვნული შემადგენლობა	ქართველები 96 %, სომხები 2,5 %
სასაათო სარტყელი	UTC+04:00
სატელეფონო კოდი	(360)
საფოსტო ინდექსი	1702

ისტორია

მოხსენიებულია ვახუშტი ბატონიშვილის „საქართველოს გეოგრაფიასა“ და იოანე ბატონიშვილის 1794-1799 წლების „ქართლ-კახეთის აღწერაში“. სოფელს იცნობდა ი. გიულდენშტენდტიც. სოფლის სახელწოდება „ბოსლები“ დაფიქსირებულია 1898 წლის რუსეთის ერთვერსიან რუკაზე „Бослеби“ სახით.

ღირსშესანიშნაობები

სოფლის მახლობლად დგას ქართული ხუროთმოძღვრების ძეგლი ბოსლების სამების ეკლესია, რომელიც არქიტექტურული ფორმებითა და ჩუქურთმებით XIII საუკუნის I ნახევარს მიეკუთვნება. ორ საფეხურად განლაგებულ ცოკოლზე აღმართულ დარბაზული ტიპის ერთნავიან ეკლესიას ჩრდილოეთიდან ეკვრის ნახევარწრიული აფსიდით დასრულებული ეგვტერი, რომელსაც შესასვლელი კარი დასავლეთის მხრიდან აქვს, მეორე კარით კი ეკლესიასთან არის დაკავშირებული. ძეგლი დაზიანებულია. შემორჩენილია მხოლოდ აღმოსავლეთის და დასავლეთის კედელი. შენობა შიგნით და გარედან შემოსილი იყო მომწვანო ფერის სუფთად გათლილი ქვის პერანგით. ნათდებოდა ხუთი სარკმელით. შესასვლელი სამხრეთიდანაა. ეკლესიის ფასადები უხვად ყოფილა მოჩუქურთმებული. აღმოსავლეთ ფასადზე შემორჩენილია აჟურულთაღებიანი სამკუთხა ნიშები, სარკმლებს ჩუქურთმებიანი საპირეები ამკობდა. მოგვიანებით ეკლესია შეულესავთ და მოუხატავთ.

ლიტერატურა

• ქართული საბჭოთა ენციკლოპედია, ტ. 2, თბ., 1977. — გვ. 481.

• ნ. ანდღულაძე, ენციკლოპედია „საქართველო“, ტ. 1, თბ., 1997. — გვ. 469.
• მუსხელიშვილი ლ., „არქეოლოგიური ექსკურსიები მაშავერას ხეობაში“, თბ., 1941
• Чубинашвили Н. Г., «Церовани», Тб., 1976