ტიტო ვილანოვა

ტიტო ვილანოვა
	ვილანოვა 2012 წელს
პირადი მონაცემები
სრული ; სახელი	ფრანსესკ ვილანოვა ბაიო
დაბადების ; თარიღი	17 სექტემბერი, 1968
დაბადების ; ადგილი	ბელკაირე, ესპანეთი
გარდაცვალების ; თარიღი	25 აპრილი, 2014 (45 წლის)
გარდაცვალების ; ადგილი	ბარსელონა, ესპანეთი
სიმაღლე	1.82 მ
სათამაშო ; პოზიცია	ნახევარმცველი
ახალგაზრდული კარიერა
1984-1988	ბარსელონა
პროფესიონალური კარიერა*
სამწვრთნელო კარიერა
2003-2004	პალაფრუგელი
2007-2008	ბარსელონა B (ასისტენტი)
2008-2012	ბარსელონა (ასისტენტი)
2012-2013	ბარსელონა
	* პროფესიონალურ კლუბებში გამოსვლა და გოლები მხოლოდ ეროვნული ლიგებისთვის იანგარიშება;

ფრანსესკ „ტიტო“ ვილანოვა ბაიო (დ. 17 სექტემბერი, 1968, ბელკაირე, ესპანეთი — გ. 25 აპრილი, 2014, ბარსელონა, ესპანეთი) — ესპანელი ფეხბურთელი და მწვრთნელი. მოთამაშის რანგში ვილანოვამ ლა ლიგაში 26 მატჩი ჩაატარა. საფეხბურთო კარიერის დასრულების შემდეგ, 2007 წელს, ის გახდა პეპ გვარდიოლას დამხმარე „ბარსელონაში“, სადაც მათ 14 ტიტულის მოგება შეძლეს და კლუბის ისტორიაში ერთ-ერთი საუკეთესო გუნდი ჩამოაყალიბეს. 2012 წელს ის დანიშნა „ბარსელონის“ მთავარ მწვრთნელად, თუმცა სეზონის ბოლოს ჯანმრთელობის მდგომარეობის გაუარესების გამო თანამდებობა დატოვა. 2014 წლის 25 აპრილს ვილანოვა ყელის კიბოთი გარდაიცვალა.

ტიტო ვილანოვას ჰყავდა მეუღლე და ორი შვილი.

მოთამაშის კარიერა რედაქტირება

ვილანოვა დაიბადა ხირონას პროვინციაში, კატალონიაში. ის ახალგაზრდულ ასაკში თამაშობდა „ბარსელონას“ სხვადასხვა ასაკობრივ გუნდებში, თუმცა პირველ გუნდში მოხვედრა ვერ მოახერხა და 1990 წელს კლუბი დატოვა. ვილანოვა „ფიგუერესში“ გადავიდა, სადაც დიდი წარმატებისთვის არ მიუღწევია. „ფიგუერესი“ 1991-1992 წლების სეზონში ახლოს იყო სეგუნდა დივიზიონში გადასვლასთან, თუმცა პლეი-ოფში „კადისთან“ დამარცხდა (ორი მატჩის ჯამში 1-3). ამის შემდეგ იყო „სელტა“. ვიგოური გუნდის მაისურით ტიტომ სამი სეზონის მანძილზე ლა ლიგაში მხოლოდ 26 მატჩის ჩატარება და 1 გოლის გატანა მოახერხა.

1995 წელს ვილანოვა „ბადახოსში“ გადავიდა, სადაც 1 სეზონი დაჰყო. შემდეგ იყო „მალიორკა“, „ლეიდა“, „ელჩე“ და „გრამენეტი“, სადაც 2001 წელს კარიერა დაასრულა.

სამწვრთნელო კარიერა რედაქტირება

ტიტო ვილანოვამ სამწვრთნელო კარიერა 2003-2004 წლების სეზონში დაიწყო, მან რანგით მეოთხე ჩემპიონატში მოასპარეზე „პალაფრუგელი“ ჩაიბარა. მისი მუშაობა ნაყოფიერი ვერ გამოდგა და გუნდმა ლიგაში ადგილი დაკარგა.

2007 წელს დაიწყო ტიტოს კარიერის ყველაზე მნიშვნელოვანი პერიოდი. ხოსეპ გვარდიოლამ, რომელიც „ბარსელონა B-ს“ მთავარ მწვრთნელად დაინიშნა, ტიტო ასისტენტად მიიწვია. მათ გუნდი რანგით მესამედან მეოთხე ჩემპიონატში გადაიყვანეს, რის შემდეგაც უკვე „ბარსელონას“ ძირითად გუნდს ჩაუდგნენ სათავეში. პირველივე სეზონში გუნდმა კლუბის ისტორიაში საუკეთესო შედეგი დააფიქსირა, მოიგო ყველაფერი რისი მოგებაც შეიძლებოდა, რითაც მსოფლიო ფეხბურთის რეკორდი დაამყარეს (მაქსიმალური, 6 ტიტული 1 კალენდარული წლის მანძილზე). ვილანოვა და გვარდიოლა გუნდს 2012 წლის მაისამდე წვრთნიდნენ. ამ დროის მანძილზე გუნდმა 3 ლა ლიგის, 2 ჩემპიონთა ლიგის, 2 სამეფო თასის, 3 ესპანეთის სუპერთასის, 2 მსოფლიოს საკლუბო ჩემპიონატისა და 2 ევროპის სუპერთასი მოიგო. ვილანოვა ერთხელ გუნდს გვარდიოლას ნაცვლად თავად გაუძღვა, 2008-2009 წლების ჩემპიონთა ლიგის გათამაშების მეოთხედგინალის განმეორებით შეხვედრაში „მიუნხენის ბაიერნის“ წინააღმდეგ. პირველი შეხვედრა ესპანელების გამარჯვებით, 4-0 დასრულდა. გერმანიაში კი - 1-1 დაფიქსირდა.

2012 წლის 27 აპრილს კლუბმა ოფიციალურად დაადასტურა მთავარი მწვრთნელის თანამდებობიდან გვარდიოლას გადადგომის შესახებ ინფორმაცია. ამავე დღეს გამოცხადდა, რომ პეპის შემცვლელი ტიტო ვილანოვა იქნებოდა. მან თავის პირველ და ერთადერთ სეზონში ლა ლიგის მოგება რეკორდული, 100 ქულით („ბარსელონამ“ გაიმეორა „რეალის“ რეკორდი, რომელიც მადრიდულმა გრანდმა 1 წლით ადრე დაამყარა) მოახერხა. სეზონის ბოლოს ტიტოს გუნდიდან წასვლა მოუხდა, რადგან მას კიბოსთან დაკავშირებული პრობლემების გამო არ შეეძლო მთავარი მწვრთნელის ვალდებულებების შესრულება.

ჯანმრთელობა რედაქტირება

2011 წლის 22 ნოემბერს ტიტო ვილანოვას ყელის კიბო დაუდგინეს. ესპანელმა მკურნალობა ჩაიტარა, თუმცა მომდევნო წლის 19 დეკემბერს, როცა ის უკვე „ბარსელონას“ მთავარი მწვრთნელი იყო, კიბომ ხელმეორედ იჩინა თავი. ტიტო სამკურნალოდ ამერიკის შეერთებულ შტატებში გაემგზავრა, სადაც მარტის ბოლომდე დარჩა. ამ პერიოდში გუნდს მისი ასისტენტი ხორდი როურა წვრთნიდა. ვილანოვა გუნდს მარტში დაუბრუნდა. ჩატარებულმა მკურნალობამ კიბოს დამარცხება ვერ მოახერხა, რის გამოც სეზონის დასრულების შემდეგ ტიტო იძულებული გახდა თანამდებობა დაეტოვებინა. 2014 წლის 25 აპრილს, 45 წლის ასაკში ვილანოვა კიბოს შედეგად გარდაიცვალა.

ტიტულები და მიღწევები რედაქტირება

სამწვრთნელო რედაქტირება

ბარსელონა რედაქტირება

ლა ლიგა (1): 2012-2013

ინდივიდუალური რედაქტირება

მიგელ მუნიოსის ტროფეი (1): 2012-2013