კეტა (ლათ. Oncorhynchus keta) — თევზი ორაგულისებრთა ოჯახისა. მისი სხეულის სიგრძე 1 მ აღწევს, მასა 14 კგ. გავრცელებულია წყნარი ოკეანის ჩრდილოეთ ნაწილში. იკვებება კიბოსნაირებით, მოლუსკებით, თევზებით. მწიფდება 4-5 წლისა. გამსვლელი თევზია. ტოფობისათვის შედის მდინარეში 1000 და მეტ კმ მანძილზე. აქვს მსხვილი ქვირითი (5-7 მმ დიამეტრისა), ნარინჯისფერი. გამრავლებისას „საქორწინოდ ირთვება“, განსაკუთრებით მამალი — სხეული უმუქდება, უჩნდება განივი მუქი ჟოლოსფერი ზოლები, ზურგი უკუზიანდება, ხორცი საჭმელად უვარგისი ხდება. ტოფობის შემდეგ იღუპება. კეტა ძვირფასი სარეწაო თევზია. იყენებენ დამარილებულს, ამზადებენ ზურგიელს და კონსერვს, ქვირითისაგან — წითელ ხიზილალას. კეტა იტანს აკლიმატიზაციას და ხელოვნურადაც მრავლდება.
