'''გუბაზ II''', (გ. [[554]]), — [[ეგრისის სამეფო|ეგრისის]] [[მეფე]] [[VI საუკუნე|VI საუკუნის]] 40-50-იან წლებში, [[ბიზანტია|ბიზანტიის]] ვასალი. იგი მოხერხებულად იყენებდა ბიზანტიასა და [[ირანი|ირანს]] შორის გამართულ ბრძოლას და ცდილობდა ეგრისის სამეფოსათვის დამოუკიდებლობა მოეპოვებინა. [[541]] წელს კავშირი შეკრა ირანის მეფე [[ხოსრო I|ხოსრო I-თან]] და აუჯანყდა ბიზანტიას. მაგრამ, როცა [[548]] წელს ირანელთა ნამდვილი ზრახვები გამომჟღავნდა (გუბაზის მოკვლის განზრახვა, ეგრისელების აყრა თავიანთი მიწა-წყლიდან და იქ ირანელების ჩასახლება), აუჯანყდა მათ და ისევ ბიზანტიის მხარეზე გადავიდა. [[553]] ირანელებმა შეძლეს ბიზანტიისა და ეგრისის ჯარის დამარცხება, რასაც გუბაზ II ბიზანტიის სარდლების [[მარტინე]]ს, [[ბესა]]სა და [[რუსტიკე]]ს უნიჭობასა და ანგარებას აბრალებდა. განაწყენებულმა ბიზანტიელმა სარდლებმა გუბაზ II მოკლეს.
