კორინთის ომი

კორინთის ომი — ომი ბერძნულ ქალაქ-სახელმწიფოების კოალიციასა (თებე, არგოსი, კორინთი, ათენი, მეგარა და სხვ.) და პელოპონესის კავშირს (სპარტის მეთაუობით) შორის. მიმდინარეობდა ძვ. წ. 395-387 წლებში. მიმართული იყო სპარტის ჰეგემონიის წინააღმდეგ. დასაწყისში ბერძნული პოლისების კოალიციას მხარს უჭერდა სპარსეთი, რომელიც ძვ. წ. 399 წლიდან სპარტას ეომებოდა. სპარსეთის სახსრებით აგებულმა ფლოტმა ათენელი კონონის სარდლობით ძვ. წ. 394 წელს კუნძულ კნიდოსთან დაამარცხა სპარტელები. იმავე წელს კოალიციამ წარმატებებს მიაღწია კორონეასთან და ისთმოსზე ბრძოლებში. ათენის გაძლიერებით შეშფოთებულმა სპარსეთმა ორიენტაცია შეცვალა და სპარტის მხარეზე გადავიდა. კორინთის ომი ანტალკიდას ზავით დასრულდა.

იხილეთ აგრეთვე

• ანტალკიდას ზავი

ლიტერატურა

• ქართული საბჭოთა ენციკლოპედია, ტ. 5, თბ., 1980. — გვ. 674.