გია ბუღაძე დაიბადა 1956 წლის 24 სექტემბერს, თბილისში, ექიმების ოჯახში. ადრეული ასაკიდანვე გამოავლინა თავის ნიჭი ხატვისადმი. სწავლობდა პიონერთა და მოსწავლეთა სასახლეში, ი.ნიკოლაძის სახელობის სასწავლებელში,შემდეგ კი აპ.ქუთათელაძის სახელობის თბილისის სახელმწიფო სამხატვრო აკადემიაში (1977–1981)გიორგი თოთიბაძისა და კოკი მახარაძის სტუდიაში, სახვითი ხელოვნების ფაკულტეტზე.
80-იანი წლების ბოლოს გია ბუღაძის სახლი რუსთაველის გამზირზე გახდა ხელოვანთამხატვართა შეკრების ადგილი (კარლო კაჭარავა, მამუკა ჯაფარიძე, მამუკა ცეცხლაძე, ნიკო ცეცხლაძე, გოგა მაღლაკელიძე და სხვ.) ამავე პერიოდში ის იყო მხატვრების ჯგუფის „არქივარიუს“-ის სულისჩამდგმელი და ასევე, აქტიურად იყო ჩართული მხატვრების არაფორმალურ გაერთიანებაში „X სართული“. ის მონაწილეობდა სხვადასხვა ინოვაციურ გამოფენებსა და აქციებში. მისი სახელი ასოცირდება თანამედროვე ხელოვნების ცენტრის დაარსებასთან „ქარვასლაში“.
