რომუალდ ცუხიშვილი

რომუალდ (რომა) აპოლონის ძე ცუხიშვილი (დ. 11 დეკემბერი, 1936) — ქართველი მხატვარ-კერამიკოსი, საქართველოს მხატვართა კავშირის წევრი (1964), საქართველოს სსრ-ის ხელოვნების დამსახურებული მოღვაწე, პროფესორი.

რომუალდ ცუხიშვილი
სრული სახელი	რომუალდ აპოლონის ძე ცუხიშვილი
დაიბადა	11 დეკემბერი, 1936 (1936-12-11)
დაბადების ადგილი	კიევი, უკრაინა
ეროვნება	ქართველი
სფერო	კერამიკა, მხატვრობა

ბიოგრაფია

რომუალდ ცუხიშვილი დაიბადა ქ. კიევში, 1936 წლის 11 დეკემბერს სამხედრო-საზღვაო ოფიცრის ოჯახში. მამა — აპოლონ ცუხიშვილი, დედა — ინეზა ბერიძე, ჟურნალისტი და პოეტი.

1957 წელს, საშუალო სკოლის დამთავრების შემდეგ ჩაირიცხა თბილისის სახელმწიფო სამხატვრო აკადემიის (თსსა) გამოყენებითი ხელოვნების/კერამიკის ფაკულტეტზე. პედაგოგები: ხატვაში სერგო ქობულაძე, შოთა კუპრაშვილი, ფერწერაში — ვახტანგ ჯაფარიძე და დავით წერეთელი, ქანდაკებაში — გიორგი სესიაშვილი, ირაკლი ოქროპირიძე, კომპოზიციაში — დავით ციციშვილი, ზაქარია მაისურაძე, გიორგი ქართველიშვილი, რევაზ იაშვილი, მასალის ტექნოლოგიაში — პეპელა ვაშაკიძე, ალექსანდრე ფიცხელაური.

1963 წელს წარჩინებით დაამთავრა თსსა და დაიწყო მუშაობა სამხატვრო-საკონსტრუქტორო ბიუროში (1963-1966), შემდეგ საქართველოს ხელოვნების მუზეუმში რესტავრატორად. 1970 წელს დაამთავრა თსსა-იის ასპირანტურა და იქვე დაიწყო მუშაობა პედაგოგად. 1981-1984 წლებში საქართველოს კულტურის სამინისტროს მივლინებით მუშაობდა მოზამბიკში, სამხატვრო სკოლაში, სადაც დააარსა კერამიკის განყოფილება.

მონაწილეობა გამოფენებში

1963 წლიდან ღებულობს მონაწილეობას რესპუბლიკურ, საკავშირო და საერთაშორისო გამოფენებზე. მისი ნამუშევრები გამოფენილი იყო მოსკოვში, სანქტ-პეტერბურგში, ყოფილ იუგოსლავიაში, გერმანიაში, საფრანგეთში, შვეიცარიაში, ნორვეგიასა და მოზამბიკში. 1984 წლის ოქტომბერში ქ. მაპუტუში და ბეირაში (მოზამბიკი) გაიმართა მისი პერსონალური გამოფენა. წარმოდგენილი იყო ფერწერა, კერამიკა და გრაფიკა.

პრიზები და დიპლომები

1978 წელს მიღებული აქვს საქართველოს მხატვართა კავშირის მედალი — წლის საუკეთესო ნამუშევრისათვის — ტრიპტიქი „ძველი თბილისი“. 1980 წელს საერთაშორისო გამოფენაზე ქ. ვალორისში (ფრანგ. Vallauris), (საფრანგეთი) მიღებული აქვს დიპლომი ნამუშევრისთვის „ვარძია“. 1997 წელს ქ. ანაბერგ-ბუხჰოლცში (გერმ. Annaberg-Buchholz), (გერმანია), კერამიკის საერთაშორისო ფესტივალზე მიიღო საპატიო პრიზი. 2004 წელს თბილისში, სახვითი და გამოყენებითი ხელოვნების საშობაო ფესტივალზე მიიღო პირველი პრემია.

ლიტერატურა

• ვინ ვინაა თანამედროვე ქართულ ხელოვნებაში“, გვ, 540, 2000 წ., ნინო ზაალიშვილის საერთო რედაქციით, „ქართული ბიოგრაფიული ცენტრი“.
• Современная грузинская керамика. Автор текста и составитель Алде какабадзе. Москва „советский художник“ 1984г.

რესურსები ინტერნეტში

• სოფიო ჩიტორელიძე. ინტერვიუ მხატვარ-კერამიკოს რომუალდ ცუხიშვილთან. გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნული კვლევითი ცენტრი. დაარქივებულია ორიგინალიდან — 26 ოქტომბერი, 2021. ციტირების თარიღი: 26 იანვარი, 2020.