ნატო ტეტელოშვილი
ნატო ტეტელოშვილი (დ. 1985, თბილისი) — ქართველი ექიმი, მეცნიერი, იმუნოლოგი.
ნატო ტეტელოშვილი | |
---|---|
დაბ. თარიღი | 1985 |
დაბ. ადგილი | თბილისი |
მოქალაქეობა |
სსრკ საქართველო |
საქმიანობა | ექიმი და იმუნოლოგი |
ალმა-მატერი | თბილისის სახელმწიფო სამედიცინო უნივერსიტეტი |
ბიოგრაფია რედაქტირება
მეცნიერ-იმუნოლოგი ნატო ტეტელოშვილი პირველი ქართველი მეცნიერია, რომელიც აშშ–ში კოლუმბიის სამედიცინო ცენტრში კლონირებაზე იმუშავებს. იგი იმ ჯგუფის წევრი გახდება, რომელმაც მსოფლიო მედიცინაში გადატრიალება მოახდინა. დაამთავრა თბილისის მე-60 საშუალო სკოლა. მამა კახელი ჰყავს, დედა — უკრაინელი. ექიმობაზე ბავშვობიდან ოცნებობდა, რაც ალბათ უკრაინელი ბებიის დამსახურებაა, რომელიც პროფესიით პედიატრია. ნატომ წარჩინებით დაამთავრა თბილისის სამედიცინო უნივერსიტეტი. პროფესორ ივანე თარხნიშვილის სამეცნიერო საზოგადოების წევრიც გახლდათ, ჩართული იყო სამეცნიერო კვლევებში, მუშაობდა პროფესორ გია ბურკაძესთან და მის ჯგუფთან პათოლოგიური ანატომიის დეპარტამენტში.
ამჟამად ქართველი მეცნიერი ნიდერლანდების ერთ-ერთ უძველეს და უდიდეს უნივერსიტეტში, ქალაქ გრონინგენში მუშაობს. ეს სასწავლებელი 1614 წელს დაარსდა და 2012 წლის აპრილში ნიდერლანდების საუკეთესო უმაღლეს სასწავლებლად დასახელდა. ნატო ტეტელოშვილი ამ უნივერსიტეტში 7 წლის წინ მოხვდა. 2008 წელს ჩააბარა მისაღები გამოცდები მაგისტრატურაში და სრული დაფინანსება მოიპოვა. მალე წარჩინებულთა ე.წ. ტოპ-25 %-იანში მოიპოვა ადგილი. მაგისტრატურაში სწავლისას მისი სტატიები იბეჭდებოდა საერთაშორისო ჟურნალებში. ამან მისცა სტიმული ამავე უნივერსიტეტის დოქტორანტურაში ჩაებარებინა, ისევ სრული დაფინანსებით. იმ პერიოდში დაინტერესდა იმუნოლოგიით, განსაკუთრებით იმუნოგენეტიკითა და აუტოიმუნური პათოლოგიებით.
დოქტორანტურის თეზისზე მუშაობის დასრულების შემდეგ ნატომ აპლიკაციები გაგზავნა სადოქტორო პროგრამებზე. გამოხმაურებამ არ დააყოვნა, აშშ-დან თითქმის ერთდროულად სამი მკვლევარი დაუკავშირდა. გადაწყვეტილების მიღება გაუჭირდა, რადგან სამივე ვარიანტი საინტერესო იყო. არჩევანი საბოლოოდ კოლუმბიის უნივერსიტეტზე შეაჩერა. გასაუბრებებისა და პრეზენტაციების შემდეგ, 150 კანდიდატში აირჩიეს. 2016 წლის თებერვლიდან კოლუმბიის უნივერსიტეტის სამედიცინო ცენტრის ტრანსლაციური იმუნოლოგიის ჯგუფში იწყებს მუშაობას საყოველთაოდ ცნობილ ექიმ რემი კრეუსოტთან. ჩართული იქნება 2 პროექტში, შეისწავლის სპეციფიკურ იმუნოლოგიას და პირველი ტიპის დიაბეტს თაგვის მოდელზე. იმუშავებს კლონირებაზე უჯრედულ დონეზე, რათა მიღებულ შედეგებს დააკვირდნენ და შემდეგ ადამიანებში მოახდინონ გენებისა და უჯრედების კლონირება დიაბეტის თერაპიისთვის. ახალგაზრდა მეცნიერი დარწმუნებულია, რომ კლონური თერაპიის განვითარებით ბევრი დაავადების დამარცხება შეიძლება.
ლიტერატურა რედაქტირება
- ყაჯრიშვილი თორნიკე, ქართველი მეცნიერი აშშ-ის კლონირების ცენტრში მიიწვიეს // კვირის პალიტრა, 2015, 9-15 ნოემბერი, N45, გვ. 17