თევზჭრიალასებრნი[1] (ლათ. Bagridae) — თევზების ოჯახი ლოქოსნაირთა რიგისა. სხეულის სიგრძე 4-დან 100 სმ-მდეა (ჩვეულებრივ 50 სმ), აქვთ წაგრძელებული ფორმა; კანი შიშველია, ხშირად დაფარულია შხამიანი ლორწოთი. დინგზე აქვთ ულვაშების 4 წყვილი. ზურგისა და მკერდის ფარფლები შეიარაღებულია ბასრი და დაკბილული ეკლები, რომელთა ნაჩხვლეტი მტკივნეულია. ანალური ფარფლი მოკლეა, ცხიმის ფარფლი კარგადაა განვითარებული. ცნობილია 20-მდე გვარის 250-მდე სახეობა. გავრცელებული არიან აფრიკისა და აზიის მტკნარ წყლებში. ფარფლების დაკბილული სხივების შესახსრებებით შეუძლიათ გამოსცენ ჭრიალის მსგავსი ხმა, ასევე შეუძლიათ შეფერილობის ინტენსივობის შეცვლა. იკვებებიან ბენთოსით, კიბოსნაირებით, მოლუსკებით, ზოგიერთი — ქვირითით. მცენარეთა ფესვებზე ან სპეციალურად ამოთხრილ სოროში დაყრილ ქვირითს იცავს მამრი. მცირე ზომის სახეობები ჰყავთ აკვარიუმებში.[2]
_from_the_Chalakudy_River,_Kerala.jpg)
