ანდრეანოვის კუნძულები
ანდრეანოვის კუნძულები (ინგლ. Andreanof Islands) — კუნძულთა ჯგუფი ალეუტის კუნძულებში. განლაგებულია ამუქტისა და ამჩირკის სრუტეებს შორის. შედის აშშ-ის ალასკის შტატის შემადგენლობაში. გადაჭიმულია დაახლოებით 440 კმ-ზე. საერთო ფართობი, დელაროვის კუნძულებთან ერთად, უდრის 3924,737 კმ²-ს. უმაღლესი წერტილია ვულკანი ტანაგა (1806 მ). სულ არის 46 ვულკანური კუნძული და მრავალი პატარა კლდე. ყველაზე მნიშვნელოვანია კუნძულები ატკა და ადაკი. ანდრეანოვის კუნძულები მოქცეულია სეისმურად აქტიურ ზონაში. არის 8 მოქმედი ვულკანი. ძლიერი მიწისძვრა დაფიქსირდა 1957 და 2007 წლებში. შემოსილია სუბარქტიკული მდელოებით. ბევრია ყარსაღი; სანაპირო წყლებშია ვირთევზა და კამბალასებრნი. ანდრეანოვის კუნძულები აღმოაჩინა და პირველად აღწერა რუსმა მრეწველმა ანდრეან ტოლსტიხმა 1760-1764 წლებში. მეორე მსოფლიო ომის დროს კუნძულებზე განლაგებული იყო ამერიკული სამხედრო ბაზები. ომის შემდეგ ბაზა კუნძულ ადაკზე გაფართოვდა და გახდა მუდმივი. დაიხურა 1995 წელს.
 | |
| გეოგრაფია | |
|---|---|
| მდებარეობა | ბერინგის ზღვა |
| კოორდინატები | 51°52′22″ ჩ. გ. 176°11′44″ დ. გ. / 51.87278° ჩ. გ. 176.19556° დ. გ. |
| მთავარი კუნძული | ატკა |
| ფართობი | 3924,737 კმ² |
| სიგრძე | 440 კმ |
| უმაღლესი წერტილი | 1806 მ |
