ქვემო შუხუთი

ქვემო შუხუთი — სოფელი საქართველოში, გურიის მხარის ლანჩხუთის მუნიციპალიტეტში, შუხუთის თემის ცენტრი: (სოფლები: ქვემო შუხუთი, ზემო შუხუთი). მდებარეობს გურიის დაბლობზე, ზღვის დონიდან 15 მ., ლანჩხუთიდან 3 კილომეტრი. სოფლის ტერიტორიაზე გადის საერთაშორისო მნიშვნელობის გზის - საქართველოს საავტომობილო მაგისტრალი ს12-ის მონაკვეთი. სოფელში არის საჯარო სკოლა, სოფელში ჩამოედინება მდინარე უკანღელე. საბჭოთა პერიოდში განვითარებული იყო მეჩაიეობა.

სოფელი
ქვემო შუხუთი
ქვეყანა	საქართველო
მხარე	გურიის მხარეგურიის მხარე
მუნიციპალიტეტი	ლანჩხუთის მუნიციპალიტეტი
თემი	შუხუთი
კოორდინატები	42°04′28″ ჩ. გ. 42°04′14″ ა. გ.
დაარსდა	II საუკუნე
პირველი ხსენება	1708
ადრეული სახელები	შუხუთი
ცენტრის სიმაღლე	15 მ
ოფიციალური ენა	ქართული ენა
მოსახლეობა	1248 კაცი (2014)
ეროვნული შემადგენლობა	ქართველები 99,6 %
სასაათო სარტყელი	UTC+4
სატელეფონო კოდი	+995

მოსახლეობა

აღწერის წელი	მოსახლეობა
2002	1642
2014	1248

ღირსშესანიშნაობები

ქვემო შუხუთი მდიდარია კულტურული მემკვიდრეობის ძეგლებით. სოფლის სამხრეთით საირაოს ქედის ჩრდილოეთით დადასტურებულია წმ. გიორგის მონასტრის ნანგრევები, ე.წ. გორისგვერდზე. რომელიც ამჟამად სასაფლაოს ტერიტორიაზე არის.

სოფელში ასევე არქეოლოგიური გათხრების შედეგად დადასტურდა ერთნავიანი ბაზილიკას კვალი, რომელიც V-VI საუკუნეებით არის დათარიღებული. ეკლესია მაცხოვრის სახელობისა იყო, თუმცა აღდგენის შემდეგ მას წმ. ნიკოლოზის სახელი მიენიჭა. ეკლესიას გარს გალავანი აკრავს.

სოფელში არის ასევე ღვთისმშობლის შობის სახელობის ჯვარგუმბათოვანი ტაძრის ნანგრევები, რომელიც 1920-იან წლებში დაანგრიეს. გადმოცემის თანახმად ტაძარი ერთ-ერთი ყველაზე მაღალი ტაძარი იყო გურიასა და დასავლეთ საქართველოში. მის გუმბათზე ასასვლელად საჭირო ყოფილა 49 საფეხურის ავლა. ტაძრის გარშემო არის სოფლის მთავარი სასაფლაო.

სოფლის სამხრეთით, საირაოს ქედის ჩრდილოეთით აღმოჩენილ იქნა შუხუთის ციხე-ქალაქის არქეოლოგიური ნაშთები. ამჟამად ძეგლი შემორჩენილი არ არის.

ლიტერატურა

• ქართული საბჭოთა ენციკლოპედია, ტ. 10, თბ., 1986. — გვ. 517.